ШТО Е ПРОПОЛИС?

Прополисот е смолеста материја која пчелите ја произведуваат собирајќи материи од разни растенија, нивните пупки, листови или стебла. Доста ароматичниот прополис е леплив на допир, има горчлив вкус и при горење има мирис на темјан. Користејќи ја антиоксидантната и антимикробната карактеристика на прополисот, всушност, пчелите ја чистат и ја изолираат својата кошница. Земајќи предвид дека зборот прополис е спој од грчките зборови „ про“ (заштита) и „полис“ (град), може да заклучиме дека пчелите ја создаваат оваа материја со цел да се заштитат од други инсекти, габи и бактерии, како и да овозможат хигиенски услови. Иако бојата на прополисот зависи од видот на растението од кое се создава, најчесто има кафеава боја.

За лековитите својства на прополисот пишува и во најстарите книги за лекување, бидејќи тој зазема огромен дел од народната медицина со која луѓето барале начини да третираат болести како егземи, мозолчиња, изгореници, рани…

Зошто се користи?

Во најчесто користениот вид прополис од топола се откриени  околу 300 различни соединенија, од кои скоро 150 се биоактивни компоненти. За разлика од пчелиниот полен, прополисот ги содржи витамините Б1, Б2, Ц и Е, како и минералите   цинк, бакар, железо, калциум, магнезиум, натриум и калиум. Со правилна употреба, квалитетниот прополис помага при уништување  вируси и бактерии и, исто така, го зајакнува имунолошкиот систем.

Докажано е дека прополисот е составен од 50 % смола, 30 % восочна материја, 10 % есенцијални и ароматични масла, 5 % полен и 5 % минерална материја од органски остатоци. Сепак, необработениот прополис е мешан со восочна супстанција која е тешка за варење во организмот. Важно е да биде правилно одвоен хранливиот дел кој наликува на смола и затоа природно добиената материја не е препорачлива за консумирање.

Како природен антибиотик го подобрува имунитетот. Лековитоста на прополисот произлегува од неговото антиоксидантно дејство, тој дејствува на слободните радикали и ја спречува можноста за појава и развој на карцином.

Постојат истражувања кои докажале дека прополисот дејствува како еликсир за младоста,  бидејќи помага при обнова на ткивата. Поради фактот што сам по себе е антисептик, совршено ги дезинфицира повредите и раните и со помош на лепливата содржина ги затвора раните и им оневозможува на бактериите да дојдат во допир со раната, при што се забрзува процесот на заздравување  рани, херпеси или, пак,  изгореници.   Прополисот ја подобрува циркулацијата и на тој начин ја забрзува епителизацијата на кожата.

Прополисот има многу позитивни ефекти врз здравјето на луѓето. Тој е многу богат производ во однос на неговите придобивки. Покрај неговите антибактериски, антивирусни, антифунгални и антиинфламаторни содржини, познато е дека има превентивни и терапевтски својства за многу различни заболувања.

Како се користи?

Прополисот, за кој се смета дека е ефикасен особено во зајакнувањето на имунолошкиот систем и елиминирање на непријатноста во устата и грлото, е достапен во форма на капки растворливи во вода, таблети, капсули, креми, спрејови, сирупи и во форма на прав. Поради разновидноста на неговите форми, прополисот се применува на кожата или орално.

• • Течен прополис –може да се капне капка прополис на раните кои  се појавуваат во усната празнина или, пак, да се прави гаргара за прочистување на грлото.
  • Таблети или капсули од прополис – се консумираат за зајакнување на имунолошкиот систем.
  • Крем од прополис – се користи за третмани на кожата или, пак, во процесот при заздравување  рани.
  • Спреј од прополис – корисен за лекување  инфекции во грлото.
  • Сируп од прополис – ја намалува кашлицата и ги лечи раните во усната празнина.
  • Прополис во прав – најчесто се консумира во комбинација со мед или, пак, се додава на пијалаци како, на пример, јогурт.

Пред употреба на прополис во која било форма, консултирајте се со вашиот лекар или фармацевт во врска со правилното дозирање и начин на употреба.

Дополнително имајте на ум дека некои од природните состојки кои  ги има во прополисот, може е да го забават згрутчувањето на крвта. Затоа, доколку ви претстои некаква операција, не треба да консумирате каков било  хербален или, пак, природен производ.

Не консумирајте прополис, доколку сте алергични на мед.

Бремените жени, доилките и луѓето со респираторни заболувања, како астма, треба да се консултираат со својот лекар пред употреба на прополис.

Како и сите природни производи, така и прополисот треба да се консумира во умерени количини.