ВИДОВИ И ТРЕТМАН НА АЛЕРГИИ

Алергијата е абнормална реакција на имунолошкиот систем на организмот на контакт со супстанции кои нашето тело ги смета за туѓи. Притоа, имунолошкиот систем произведува одредени супстанции наречени антитела. Некои од овие антитела штитат од несакани надворешни супстанции, кои можат да предизвикаат болест и инфекција. Но, не сите туѓи супстанции се штетни. Некои од овие супстанции се нормално (кај луѓе кои не се алергични) безопасни и не предизвикуваат алергиска реакција, додека кај луѓето кои страдаат од алергија предизвикуваат алергиски реакции.

Во зависност од предизвикувачите, познати се неколку видови  алергии:

• • Алергија на полен/алергиска кивавица
  • Алергија на храна
  • Алергија на убод од инсекти (алергија на отров од пчела и оса)
  • Алергија на домашна прашина
  • Алергија на животни
  • Алергија на латекс
  • Алергија на лекови

За жал, алергиите секогаш имаат генетска основа. Односно, склоноста кон алергии се наследува, а најсклони се луѓето кои имаат близок роднина со алергија. Доколку обајцата родители се алергични, шансите за развој на алергија кај детето се 80 %. Ако е само еден од родителите алергичен, генетските предиспозиции за наследување се 50 %. Според најновите научни истражувања, употребата на антибиотици кај мали деца или бремени жени ја зголемува веројатноста за појава на астма на рана возраст. Ова е поради тоа што антибиотиците напаѓаат одредени видови бактерии кои се многу важни при заштита од алергии. Кога се користат за време на бременост или во текот на првата година од животот на детето, се забележува дека  алергиите кај овие деца во предучилишна и училишна возраст се поизразени. Употребата на антибиотици треба да се сведе на минимум. Покрај нивните директни ефекти, антибиотиците генерално влијаат и врз лимфоцитите кои се одговорни за имунолошкиот систем.

 Како да се спречат алергиите?

Алергиите влијаат на секојдневниот живот. Затоа, со појавата на првите знаци на алергија, треба да се преиспита околината, потенцијалните надразнувачи или алергени, времето на појавата, траењето на симптомите, како и нивното влијание врз квалитетот на животот; дополнително консултирајте се со вашиот матичен лекар или алерголог. Превенцијата е најефикасниот начин за лекување  алергии. Алергените треба да се препознаат и да се избегнува каков било контакт со нив. Иако третманите може да помогнат во ублажување на симптомите на алергија, пациентите треба да избегнуваат изложеност на специфични алергени и да го зголемат внесот на калциум и витамин Ц во организмот.

Алергиските манифестации и симптоми

Алергиските манифестации варираат во зависност од областа на телото што e најмногу засегната (понекогаш, алергиските реакции дејствуваат во комбинација): алергиски болести на очите – алергиски конјунктивитис; пореметување на носната слузница –алергиски ринитис; воспаление на дишните патишта – бронхијална астма; алергиски кожни заболувања – уртикарија. Вообичаените симптоми на алергиски реакции вклучуваат отежнато дишење, воспаление, црвенило, чешање  на очите, кивање, кашлање, чешање, секреција од носот, темни кругови под очите, оток, црвенило на лицето, уртикарија, повраќање, грчеви во стомакот и подуеност или иритација на цревата. Најтешките реакции вклучуваат стегање на бронхијалните канали (астма), отежнато дишење и анафилактичен шок, кој може да има фатални последици ако не се лекува на време. Алергиите, исто така, може да резултираат со стрес врз дигестивниот систем, цревните гасови и нарушено варење или интолеранција на храна. Кај чувствителните луѓе може да предизвикаатвоспаление на јазикот или устата.

Третман

Најефективниот третман  на алергиите е избегнувањето на алергенот. Сепак, понекогаш е невозможно целосно да се избегне алерген. Во принцип, не постои лек за алергии, но има неколку видови  лекови достапни за ублажување и справување со симптомите, како што се антихистаминиците, деконгестивите, комбинација од двете групи, леукотриенските антагонисти, кортикостероидите и имунотерапијата за алергии.