ГРЧЕВИ КАЈ БЕБИЊА

Голема мака во малиот стомак

Статистиката покажува дека секое четврто бебе има изразени грчеви во стомакот, подеднакво и машките и женските бебиња, подеднакво во сите делови од светот.

Една од најчестите причини за доаѓање на родителите во дежурните педијатриски амбуланти се грчевите. Во првите неколку недели по доаѓањето од родилиштето задоволното и негувано новороденче станува вознемирено, неутешно плаче без видлива причина. Нападот почнува одненадеж, детето не е можно да се смири, па родителите се плашат да не е гладно или болно, брзаат на педијатар за да ја отстранат причината за неутешното плачење кое ги вознемирува и искусните родители. Секое плачење, промената на општата состојба на новороденчето или малото доенче бараат детален преглед и исклучување на други, патолошки причини за болното плачење со врескање. Изгледа како нешто сериозно да го боли, периодите на интензивно плачење се повторуваат неколку дена во неделата неколку месеци. Додека вознемирените родители во дежурните болници бараат причина за ваквата состојба, грчевите обично поминуваат, ненадејно, како што и почнале.

Причини за настанок на грчевите

Нема разлика меѓу децата кои се хранат со мајчино млеко и оние на адаптирана млечна формула. Овие грчеви се јавуваат кај здраво бебе кое добро напредува и потполно е задоволно во другите делови од денот. Познато е правилото „три“: бебиња кои плачат повеќе од три часа дневно, повеќе од три дена во неделата веројатно имаат грчеви (инфантилни колики). Се јавуваат околу втората недела од животот и траат обично додека бебето не наполни три месеци. Освен плачот, бебето ги свиткува ноџињата кон стомакот, сè се завршува со испуштање гасови.

Причината за настанок на овој стодневен плач не е во целост разјаснета, иако генерации педијатри и семејни лекари (и генерации родители) се занимавале со можните причини за оваа голема мака во малиот стомак. Изгледа дека инфантилните колики ги предизвикува незрелоста на цревата, ги влошува голтањето воздух при хранењето, храната која ја јаде мајката, вознемиреноста и стресот во семејството. Испитувана е активноста на цревниот ензим кој го вари млечниот шеќер, намалената количина од овој ензим и слабата населеност на цревата со добри бактерии може да бидат основа за болно растегнување на цревата со големи меури од гасови. Сите овие сознанија се користат во производство на лекови и медицински средства кои стануваат драгоцен соработник во смирување на грчевите.

Симптоми и ненадејни напади

Родителите обично ги опишуваат грчевите како сосема поинакво плачење од она преку ден. На момент помагаат вообичаените методи на смирување: ритмично лулање, вртење на стомак, цврсто повивање, хранење, подждригнување. Како сè да помага во моментот, а потоа се повторува по неколку часа. Во останатиот дел од денот детето добро јаде, задоволно е и убаво напредува. Најчесто се јавуваат во попладневните или вечерните часови кога мајката веќе е уморна, семејството е собрано заедно, значи тогаш кога стресот е доведен до врвот, кога желбата за уживање во мирната вечера ќе биде прекината со повеќечасовно вриштење. Ритамот на хранење, редовното празнење на цревата, долго држење по хранењето ‒ сè тоа се методи кои ги советува околината и сајтовите што се занимаваат со родителски проблеми и нема родител кој не ги испробал.

Кога да посетите педијатар?

Ако имате каква било дилема има ли вашето дете типични грчеви или станува збор за нешто друго, не го избегнувајте одењето на педијатар. Никој не ја познава вистинската природа на грчевите, па ни стручњаците. Не се работи за болест, нема вистински методи за дијагностицирање и лекување. Суштината на одењето на педијатар е во разговор со стручњак да заклучите дека вашето дете е здраво, дека има доволно храна и нега. Грчевите не оставаат никакви последици по здравјето на детето, обично престануваат тогаш кога сте доведени на работ на очај и кога веќе неколку пати ќе ја поминете ноќта во чекалницата на дежурната болница.

Нема универзално решение

Обидете се да го прифатите фактот дека причината за инфантилните колики е непозната. Ако непрекинато се обидувате да дознаете каде грешите, ќе направите многу грешки менувајќи го видот на храна, начинот на хранење и спиење. Сите досегашни објаснувања имаат нешто заедничко, а тоа е дека не даваат одговор зошто се јавуваат во одреден дел од денот, во ист процент кај предвреме и навреме родените деца, кај доени и дохранувани, без оглед на тоа дали детето го дои уморна мајка или го храни со шише смирениот татко. Прво посоветувајте се со педијатар дали се во прашање типични инфантилни колики.

Како да му се помогне на бебето да се избори со грчевите?

Доколку секое попладне сте сведок на интензивното плачење на своето бебе, конструктивно помирете се со проблемот. Нападите не можете да ги спречите, ниту да влијаете на нивниот тек, но не можете ни да оставите така мало суштество само со нив да се соочува. Пробиотици, ензими и лекови кои ги намалуваат гасовите може да бидат драгоцени сојузници. Посветете му тогаш време и внимание, трпеливо чекајќи да помине и тој период на раст и развој.