ВЕЖБАЊЕ НА ВИСОКИ ТЕМПЕРАТУРИ

Доколку сте решиле ова лето да почнете со вежбање, во рамки на позитивните промени на своите секојдневни навики, ви препорачуваме прво задолжително да се консултирате со својот лекар. Она што е сигурно е дека почетното ниво на интензитет на тренингот не смее да биде високо, за почеток доволно е да се внесат секојдневни лесни прошетки во распоредот на дневните активности. Во текот на летните горештини не се советува престој надвор во периодот од 10 до 17 часот, а истите препораки важат и за термините за тренинг, и за почетниците и за оние кои веќе тренираат од порано.

Ве потсетуваме дека далеку е поважно да се вежба така што вашиот организам ќе има здравствени придобивки од тоа, отколку да си докажувате себеси дека нешто можете да направите без оглед на топлината.

Вежбање надвор или внатре?

Кога температурите надвор се екстремно високи, подобро е да се прескокне тренингот, или да се направат неколку лесни вежби доколку немате услови за вежбање во затворен климатизиран простор. Раните утрински и доцните попладневни и вечерни часови се време од денот кога е можно да се тренира надвор. Изберете простор за вежбање така што ќе бидете заштитени од ладовината на дрвја или згради.

Хидратација

Внесувањето течности е задолжително пред, за време и по тренирањето. Секако дека не треба да се претерува со количината на испиена течност, бидејќи може да доведе до негативни ефекти. Два часа пред тренинг би требало да се испие околу половина литар течност. За време на вежбањето не треба да се чека да ожеднете, бидејќи тоа значи дека организмот веќе делумно дехидрирал. Се препорачува на секои 15-20 минути да испиете околу 2 дл вода. При зголемено потење, организмот губи електролити кои треба да се надоместат, во текот на тренингот како и во периодот по вежбањето. Со својот фармацевт можете да се консултирате околу изборот на препарати наменети за оваа цел (води збогатени со додатоци на минерали, разни дотатоци на исхраната и слично).

Во друштво е позабавно и побезбедно

Вежбањето во друштво има бројни предности, а ние ќе наведеме само некои од нив. Прво и основно е дека сте далеку побезбедни кога покрај вас има уште некој. Дури и на поискусните вежбачи може да им се случи да ги преценат своите можности и да почувствуваат симптоми на слабост и несвестица, предизвикани од дехидратација, исцрпеност и топлина. Тогаш од животна важност може да биде присуството на уште некој, подготвен да помогне и навремено да реагира. Мотивацијата е важен дел од тренингот, а заедничкото вежбање подразбра заемно бодрење. Покрај тоа, вежбањето во друштво е идеално за оние кои тренинзите ги избегнуваат затоа што се монотони.