ШТО Е МАГНЕЗИУМ И КАДЕ ГО ИМА ВО ОРГАНИЗМОТ НА ЧОВЕКОТ?

Магнезиумот (Mg2+) е есенцијален макроелемент за организмот на човекот. Самото тоа што е есенцијален, говори дека не се произведува во човечкиот организам, поради што е неопходно   да се внесува преку исхраната. Дневните потреби за магнезиум изнесуваат од 400 до 420 mg магнезиум на ден за возрасни здрави мажи, а од 310 до 320 mg магнезиум на ден за возрасни здрави жени.

Во организмот на здраво возрасно лице има околу 24 грама магнезиум. Најголемиот дел од магнезиумот во организмот го има во коските, а остатокот се наоѓа во мускулите, меките ткива, црвените крвни зрнца и во крвта.

Улоги на магнезиумот во организмот на човекот

Магнезиумот во организмот на човекот е потребен за одвивање на повеќе од 300 метаболистички  процеси – главно процеси кои обезбедуваат енергија или трошат енергија. Магнезиумот во организмот ги има следниве улоги:

1. Градбена улога влегува во состав на коските и забите
2. Функционални улоги:

1. • контракција на скелетните мускули – со оваа улога овозможува мускулна активност кај луѓето,
   • овозможува правилна функција на срцевиот мускул,
   • контракција на мазната мускулатура – покрај учеството во контракција на скелетната мускулатура, магнезиумот, исто така, учествува во контракција на мазната мускулатура. Многу органи во човечкиот организам се изградени од мазни мускули (желудник, црева, крвни садови),
   • одржува тонус на крвните садови,
   • го намалува крвниот притисок преку блокада на калциумот,
   • учествува во преносот на нервни импулси,
   • учествува во создавањето енергија која е неопходна за функционирање на човечкиот организам,
   • учествува во создавање на паратироидниот хормон,
   • важен е за создавање на витаминот Д.

Недостиг на магнезиум
Недостиг на магнезиум во човечкиот организам може да се појави поради:

• • намален внес,
  • загуба од гастроинтестиналниот тракт поради намалена апсорпција, повраќање, пролив (Кронова болест и други воспалителни болести на цревата, иритабилен колон, зачестена употреба на лаксативи),
  • зголемени потреби при бременост и доење,
  • долготрајна употреба на диуретици (тиазидни диуретици и диуретици на Хенлеова петелка),
  • дијабетес,
  • глутенска ентеропатија,
  • пореметена бубрежна функција како последица на хемодијализа,
  • хроничен алкохолизам,
  • хемотерапија,
  • зачестени FAD диети („брзи диети“),
  • употреба на одредени лекови (антациди, тетрациклини, аминогликозиди).

Умерен хроничен недостиг  на магнезиум може да предизвика и хроничен инфламаторен стрес во организмот на човекот кој може да биде причинител на некои заболувања, како што се:

• • пореметување на работата на срцето,
  • висок крвен притисок,
  • атеросклероза,
  • дијабетес и метаболистички синдром,
  • дислипидемија,
  • коронарна срцева болест,
  • остеопороза,
  • хроничен запек (опстипација),
  • зголемена кристализација на калциум оксалат во урината кај човекот,
  • малигни заболувања.

Знаци на недостиг на магнезиум во организмот може да бидат: пореметување во голтањето, намален апетит, замор, хроничен запек, раздразливост, грчеви во мускулите, ноќни грчеви во мускулите на нозете, тикови, тетанија, апатија, дезориентираност, намалена способност за учење.

За здрав живот и добра кондиција, потребно е магнезиумот соодветно да се внесува во организмот во секоја фаза од животот.